地產商才是揸fit人 (2010年5月12日)

東涌地皮昨日拍賣，地產商切切到場看政府点樣尷尬。南豐自彈自唱六口價以34億(略高於底價)成交。又一證明，地產商大晒，佢要個樓市升就落力投地，佢要個樓市跌，賣地時齊齊唔舉手又得。政府出九招虛招，佢地一招就夠了，就是聯手唔投地，樓價即時舒壓，遲些再出一招，新樓開價低於二手價，樓市即時應声下挫，問你怕味？仲感唔感再提復建居屋夾屋？而佢地唔投地，供應减少，對佢地最有利，一方面政府賣唔到地，稅收減少，加上樓價下跌，印花稅減，庫房稅收又少啲，政府怕怕，唔感再對佢地唔客氣，唔好再講「針唔吉到肉」，句嘢留番鄭汝樺自己用喇。另一方面供應減少，遲些樓價又可升無限！

在此奉勸政府把握時机盡早脫離地產商魔掌，讓香港人重新主宰香港經濟吧！

鄭汝樺停建居屋歪理 (2010年5月5日)

鄭汝樺對於停建居屋的說話真是似是而非。我也有話要說：

1. 香港政府從港英年代至今時今日都實施着高地價政策，土地公開拍賣，價高者得，地產發展商勾地出價低又唔賣，如果這不叫高地價政策都不知應該叫什么了。港英年代比較優勝之處是有自知之明，高地價政策下興建居屋作為緩衝。現時香港政府又實施高地價政策又取消興建居屋，樓價狂升時，貧富懸殊加劇，當然激發民憤。即是說香港政府一是繼續實施高地價政策並建居屋作緩衝，減低民怨，一是取消高地價政策，也取消興建居屋。樓價升不理，樓價跌也不要托，香港政府，你做得到嗎？
2. 市場供應失衡，即使有地並指定土地只可興建細單位,地產發展商仍然將細單位豪宅化，以豪宅價出售。地產發展商不是慈善家，不能只期望地產發展商興建上車盤，他們不建，也不能怪他們，因為這不是利益所在。即是說即使增加土地供應，市場也不能自我平衡供應，那么政府便應諗諗另類供應，居屋是一種考慮。
3. 樓價跌，政府怕佢跌，就收緊土地供應，到見到樓價升，又驚樓市隨時逆轉，又唔想做任何對樓市不利的動作，经常搬八萬五出來恐嚇人，八萬五唔得，可否四萬五呢？起碼讓市民知道政府有Plan，而唔係政府只會看升，不接受跌的scenario。換句話說，請鄭汝樺給我們一個房屋政策。
4. 政府又經常搬一百萬業主出來作擋箭牌，樓價是否真的只會升不會跌嗎？政府，你問心？買樓的人是否應自己承担風險？ 如果政府政策長期以保障地產收益為依歸，那么市民便錯誤認為買樓無風險，長升長有。
5. 政府有責任令市民居者有其所，但唔係要「家家有層樓」，但現在市場只供應豪宅，而二手樓也因一手樓豪宅價而水漲船高，市民收入卻下跌，導致家家冇層樓，有豪宅冇人住，有層細樓業主無法轉大樓，呢個又是否政府一貫的房屋政策？
6. 實情係政府稅收依賴地產，經濟逆轉，樓價下跌，政府稅收減，政府公務員包括曾蔭權、鄭汝樺要減薪，滅赤，正所為針唔吉到肉唔知痛。市民租樓租到肉痛，自然要貢獻地產商，樓價幾貴都局住要買，做其樓奴，乖乖地幫地產商和銀行打成世工，普選時候選番佢或佢嘅同志們，佢擔保各樓奴們的利益長存，這就是政府利益所在。